Kjördæmasvindlið

Í fyrsta lagi þá er engin eftirsjá að Sigurði Kára.

Í öðru lagi þá er kjördæmaskiptingin galin. Norðvesturland hefur tvöfalt atkvæðavægi á við okkur í Suðvestur (Kraganum).

Tölurnar eru sumsé þessar:

Kjördæmi	Kjörskrá	Þingmenn	atkv/þingmenn	vægi
Rvk N	43784	11	3980	1,2
Rvk S	43748	11	3977	1,2
SV	58203	12	4850	1,0
NV	21294	9	2366	2,0
NA	28362	10	2836	1,7
Su	32505	10	3251	1,5

Þarna fær sumsé lægsta gildið vægið 1 og svo hin reiknuð út frá því.

Til að laga þetta þannig að við förum nær því að ná 1 maður 1 atkvæði þá yrði þingmannaskiptingin svona:

Kjördæmi	Þingmenn	Breyting
Rvk N	12	+1
Rvk S	12	+1
SV	16	+4
NV	6	-3
NA	8	-2
Su	9	-1

Ef landið væri allt eitt kjördæmi þá hefðu úrslit kosninganna orðið aðeins öðruvísi:

(breytt, auð og ógild atkvæði tekin út úr útreikningi)

Listi	Atkvæði	Þingmenn	Útreikningur	Þingmenn	Breyting
B	27669	9	9,31	9	0
D	44369	16	14,93	15	-1
F	4148	0	1,40	1	+1
O	13519	4	4,55	5	+1
P	1107	0	0,37	0	0
S	55758	20	18,77	19	-1
V	40580	14	13,66	14	0

Þarna koma sumsé jöfnunarmenn inn í eftirfarandi röð:

Sjálfstæðisflokkur,  Samfylkingin, Borgarahreyfingin.

"Turnarnir þrír" græddu því mest á atkvæðamisvæginu og litlu flokkarnir fóru verst út úr því. Þetta sýnir að 5% jöfnunarreglan er bull sem hyglar hinum stóru en ekki þeim litlu eins og það var auglýst þegar lögin voru sett og sumir reyna að halda fram.

 Fyrri færsla sýndi þingmannatölur ef að auðir og ógildir hefðu verið inni í útreikningum, samkvæmt þeim fengju Lýðræðishreyfingin og Frjálslyndi flokkurinn aukaþingmann hvor í staðinn fyrir þingmann Samfylkingar og Vinstri grænna.

Sigurður Kári í sömu sporum og Mörður Árnason var

Athugasemdir

[Ólafur Ingólfsson, 28.4.2009 kl. 10:13]

Góður pistill og þarfur. Auðvitað verður að breyta þessu, það er útí hött að íbúar í NV kjördæmi hafi í raun 2 atkvæði á móti hverju einu sem SV hefur. Einfaldasta lausnin er að landið verði allt eitt kjördæmi.

[Stokkarinn, 28.4.2009 kl. 10:14]

Ágætis ábending hjá þér en útreikningarnir eru því miður ekki réttir hjá þér.

Í útreikningunum gerir þú ekki ráð fyrir nema 60,79 þingmönnum og dreifir svo 63 yfir á flokkana.

Miðað við reiknigrunn 63 þingmanna skiptust þeir þannig á milli flokkanna:
B     9
D    15
F    1
O    5
P    0
S    19
V    14

En enn á ný myndu litlu flokkarnir fá þingmenn á kostnað þeirra stærri.
Vonum að með vinstri sinnaðari stjórn verði búið til líðræðislegra kerfi.

[Fannar frá Rifi, 28.4.2009 kl. 10:17]

varðandi norðvesturkjördæmi þá er samkvæmt lögum og stjórnarskrá gert ráð fyrir bótum á þessu. í næstu kosningum þá verður einum manni færra í nv og einum manni fleira í kraganum.

[Jóhannes Birgir Jensson, 28.4.2009 kl. 10:29]

Stokkarinn: Ég gerði reyndar ekki ráð fyrir nema 60,79 heldur er þetta niðurstaðan vegna reikninganna, auðir seðlar eiga þessa rúmu 2 þingmenn sem þarna ættu vera.

Ef við miðum bara við gild atkvæði þá eru þínir útreikningar réttari, munurinn er sumsé sá að Frjálslyndir rétt missa af jöfnunarsæti sem og Lýðræðishreyfingin, og í staðinn halda Samfylkingin og Vinstri grænir einum inni.

Þarna sést klárlega vægi auðra atkvæða í þessum kosningum, þeir eiga rúmlega tvo þingmenn.

[Jóhannes Birgir Jensson, 28.4.2009 kl. 10:30]

Fannar frá Rifi: Það er ekki mikil sárabót, þá fá Norðvestlendingar 1,7 atkvæði á móti mínu eina í stað 2,0.

[Bjarki (IP-tala skráð) 28.4.2009 kl. 10:45]

Það er einhver misskilningur hér. Ef landið væri eitt kjördæmi þá væru engin "jöfnunarsæti". Þá væri D'Hondt reiknireglu væntanlega beitt á öll þingsætin líkt og gert er fyrir kjördæmissæti innan kjördæma í dag. Niðurstaðan hefði þá verið sú sem Stokkarinn setur fram. Ég veit ekki hvernig mögulegt er að komast að þeirri niðurstöðu að 0,6% gildra atkvæða hjá P-lista eigi að gefa þeim þingsæti.

[Jóhannes Birgir Jensson, 28.4.2009 kl. 10:52]

Bjarki, ég var búinn að breyta þessu áður en þú skráðir athugasemdina.

Það sýndi hins vegar vel hvaða áhrif auð atkvæði höfðu, þar "hurfu" tveir þingmenn.

Sú niðurstaða miðaðist við það að þeir voru með hæsta brotið (fraction) af þeim sem ekki höfðu fengið inn mann fyrir næsta tug eftir að búið var að úthluta öllum nema einum þingmanni.

Þess má geta varðandi NV og SV breytinguna sem verður gerð (alveg einn þingmaður færður á milli) þá í stað þess að hafa 0,5 atkvæði miðað við atkvæði í NV þá hef ég nú 0,58 (eða 0,6 ef við námundum upp). Frábær leiðrétting þar.